احنا نازلين 18 نوفمبر للاعتصام عشان ميحصلش فينا زي اللي حنقوله عن قصة الصورة دي أبدا ... و مفيش طريقة لتفادي الاعتصام غير ان المجلس يعلن قبل يوم 18 نوفمبر عن معاد الانتخابات الرئاسية ...
و ده ايفينت يوم 18 نوفمبر .. بعد العيد ... و بعد الحشد بقوة كبيرة جدا ان شاء الله بمساعدة قوى ثورية عديدة من توجهات مختلفة
نرجع للصورة ... دي مش مصر دي رومانيا الثورة الرومانيه
الثورة التي أالأضحوكة ...عارفين ليه أضحوكة؟؟
عشان ثورة هبله و إتسرقت
أقولكم إتسرقت إزاي؟.
الشعب الروماني عمل ثورة ضد نيكولا شاوشيسكو وزوجته ايلينا عشان كان مبوظ إقتصاد رومانيا و سارقها و ماكنش في عدالة إجتماعيه وتم القبض عليه تمهيدا لمحاكمته ، حيث حكم عليه وعلى زوجته بالاعدام رميا بالرصاص في 24 ساعة فقط, وفي نفس اليوم تم تنفيذ الحكم بمساعده الجيش و الناس فرحت برده و قعدوا يقولوا الجيش و الشعب إيد واحده
يعني إتقتل كمان مش إتحاكم و هو لابس ترنج و بيلعب في مناخيره... طيب حلو أوي
ماشي ايه اللي حصل بعدين؟؟
الجيش سلم الحكم لجهه سياسيه اسمها جبهة الخلاص بتتكون من الصف التاني بالحزب الشيوعي الروماني ((فلول يعني)) .و كان رئيس الحزب ده واحد إسمه إيون إيليسكو و ده احد حلفاء الديكتاتور المعدوم ((صاحبه يعني ))..مش زي طنطاوي طبعا اللي كان فيه بينه و بين مبارك طار بايت
أخونا ايون ده عمل صفقات مع جنرالات الجيش الروماني صفقات خلته يسيطر على على التليفزيون والراديو وباقى وسائل الاعلام فى الدولة .
طبعا في شباب مثقف و واعي في رومانيا شاف إن ثورتهم بتتسرق و العياذ بالله
اخونا ايون معجبوش الكلام ده فبدأ يتهم الشباب الرومانيين اللي بيقولوا عليه مغتصب للسلطه و للثورة إنهم عملاء و جواسيس و بيخدوا تمويل من جهات خارجيه و إنهم أجندات أجنبيه و بدأ يحاكمهم واحد ورا التاني...
و بقى ينكل بأي حد يعارض سياسته و يقول إن دي مرحلة إنتقاليه و إن هو مصر يوصل برومانيا لبر الأمان و استخدم الاعلام اللي بقى تحت سيطرته في تشويه صورتهم ...
و فئه غير مثقفه من أبناء الشعب الروماني صدقته و بقت تهاجم الشباب اللي كان عارف إن الثورة بتتسرق لدرجة ان عمال المناجم بمساعدة رجال الشرطه قاموا بالهجوم على الطلبه والمثقفين اثناء تظاهرهم . و قتلوا منهم من قتلوا...
و نجحت جبهة الخلاص اللي بيرأسها ... ايون (( الفلول)) بالفعل فى اسكات المعارضه الديموقراطيه باستخدام الاعلام الموجه وتم انتخاب إيون إيليسكو رئيسا للبلاد بنسبة 85% من الاصوات، وهى الانتخابات التى وصمت بعدم النزاهه من قبل الاحزاب الديموقراطيه والاعلام الغربى و مع ذلك محدش وقتها فتح بقه لأن محدش كان بيصدق الثوار خلاص،و اعيد انتخاب نفس الرجل ثلاث مرات حتى العام 2000
الجدير بالذكر حينما نتحدث عن ثمن تلك الثورة المجهضه هو عدد الضحايا : العدد الكلى لمن ماتوا كان 1,104 رومانيا منهم 162 فقط قبل تنحية شاشيسكو والباقون فى فترة الانفلات الامنى المدبره على يد جبهة الخلاص الوطنى، اصيب 3,352 رومانيا منهم 1,107 قبل القبض على الديكتاتور،
طبعا الثورة الرومانيه مختلفه تماما عن الثورة المصريه لأن إحنا ماعدش عندنا فلول
و كمان الجيش بيحمي الثورة
و إحنا بناكل ارز بلبن
نقلا عن سنحطم أنف كل من يتطاول على مصر بتصرف ...
جمعة 18 نوفمبر ... قالولنا مصر ليست تونس ... و بنقولهم مصر ليست رومانيا ...
و رسالة للشباب ... اللي منكم بيقعد في بيته ... و بعدين ينتقد اننا معملناش و مسوناش ... لازم يفهم ان أحب ما على قلبنا رحيل المجلس حالا ... بس فين الأعداد اللي نقدر بيها ننفذ ده ... ما اعتصمناش عشان نفس السبب ... مش ممكن نعتمد على صفحة أو على حركة أو جماعة مهما كانت قوتها ... لأن الثوار محتاجين كل فرد فيهم دلوقتي لأن ده وقت محنة ...و إذا مكنش كل واحد فينا حيقوم بدوره من غير ما يبص على المتقاعس اللي جمبه زي ما كل اللي نزل 25 ما عمل و نزل و هو عارف انه بنسبة 99% مش حيعمل حاجة بس بيعمل اللي عليه ... و عشان كده نجحنا ... و للاسف كان نفسي اققولكم اننا نقدر نعمل ثورة لوحدنا و نعدل المايل و نمشي المجلس و نجيب سلطة مدنية فورا... بس الحقيقة ان من غيركم ما نقدرش ... و على قد لحافك ... مد رجليك
ليست هناك تعليقات:
إرسال تعليق